人到無求品自高

網誌: 人到無求品自高 - agentbong

三歲定八十,趁小朋友成長時間,打好基礎真係好重要。幾年前,為咗要好好照顧譚仔,譚師奶毅然離別職場,做全職主婦。好明白求學並唔係求分數,唔會瘋狂帶譚仔上補習班,只係希望教識譚仔做人處世。人心正,條路未必會康荘,但一定唔會走歪路,所謂「仁者無敵」也。

走正路,每個人準則唔同。有人會將把尺放喺法律上,只要唔殺人放火,已經係正路;有人會就將把尺放喺功名利祿上,要年薪百萬有樓收租,方為正路;又有人將把尺放喺道德高牆,覺得為公正自由抗爭,係勞民傷財唔正路;而有人就會將把尺放喺「問心無愧」度。

政改滑鐵盧,林鄭總結三人組喺推動表現上係「問心無愧」;曾蔭權回應貪污指控,面對記者,昂然宣稱「行事光明,問心無愧」;港大校委會主席梁智鴻表示,自己「憑良心」做出對香港大學最好嘅事情。

當「問心無愧 」應用喺以上情況,究竟應該點樣解讀?相信比起譚仔嗰題數學, "列出一個包含4個「0」,但不用讀出「零」的最大5位數",更加難解答。喺充斥住指鹿為馬,鉛水變源水,是非不分嘅歪風下,要教導小朋友正途,真係唔容易呀。計我話,對住特區政府,除咗要求「問心無愧」之外,仲要學官員咁樣,做到「無求」,唔係「不思進取丶庸碌無為」;宜係「有所不求才能有所追求」。

師奶簡介: 全職家庭主婦,夢想環遊世界。利用做家務空餘時間,網上神遊世界,馳騁文學歷史。

圖片: 互聯網


香港NO.1家居服務自助配對平台

立即下載,成為Agentbong用戶